മഞ്ഞുരുകി; സ്വിസ്സ്‌ അതിര്‍ത്തി ഇറ്റലിയിലേക്ക്‌ വ്യാപിച്ചു
ബേണ്‍: ഇറ്റലിയുടെ ചെലവില്‍ സ്വിറ്റ്‌സര്‍ലാന്‍ഡിന്റെ അതിര്‍ത്തി വിപുലമായി. ആല്‍പ്‌സ്‌ പര്‍വത നിരകളിലെ മഞ്ഞുപാളികള്‍ ഉരുകിയതിനെ തുടര്‍ന്നാണിത്‌.
അതിര്‍ത്തി മേഖലകളിലെ ചില പ്രദേശങ്ങളില്‍ 150 മീറ്ററാണ്‌ ഇറ്റലിയില്‍ നിന്ന്‌ സ്വിറ്റ്‌സര്‍ലാന്‍ഡിലേക്ക്‌ കൂട്ടിച്ചേര്‍ക്കപ്പെട്ടത്‌. 1942 ല്‍ നിശ്ചയിച്ച അതിര്‍ത്തിയാണ്‌ വിപുലീകരിക്കപ്പെട്ടതായി സ്വിസ്സ്‌ ഗവണ്‍മെന്റ്‌ കഴിഞ്ഞ ദിവസം അംഗീകരിച്ചത്‌. നേരത്തെ തങ്ങളുടെ ഭാഗമായിരുന്ന മേഖലയിലേക്കുള്ള സ്വിസ്സ്‌ വിപുലീകരണത്തെ ഇറ്റലി ഇതിനകം തന്നെ അംഗീകരിച്ചിട്ടുണ്ട്‌.
ആല്‍പ്‌സിലെ പടുകൂറ്റന്‍ മഞ്ഞുപാളികളും മഞ്ഞു പാടങ്ങളും ഉരുകി, നേരത്തെയുണ്ടായിരുന്ന നീര്‍ത്തടത്തിന്റെ വിസ്‌തൃതി വര്‍ധച്ചതിനെ തുടര്‍ന്നാണ്‌ അതിര്‍ത്തി പുനര്‍ നിര്‍ണയിച്ചത്‌. 1942 ല്‍ ഉണ്ടായിരുന്നതിലും നീര്‍ത്തടത്തിന്‌ വിസ്‌തൃതി ഉണ്ടായപ്പോള്‍ സ്വിറ്റസര്‍ലാന്‍ഡിന്‌ അത്‌ ലാഭമായി. ഇറ്റലിക്കാകട്ടെ സ്ഥല നഷ്‌ടം സംഭവിക്കുകയും ചെയ്‌തു.
സ്വിറ്റ്‌സര്‍ലാന്‍ഡിലെ പ്രകൃതി സ്ഥിതി പഠന ഓഫീസ്‌ നടത്തിയ പരിശോധനകള്‍ക്കൊടുവിലാണ്‌ അതിര്‍ത്തി പുനര്‍ നിര്‍ണയിച്ചത്‌. സ്വിസ്സ്‌ അതിര്‍ത്തി അല്‍പം വര്‍ധിച്ചെങ്കിലും ഔദ്യോഗിക അറ്റ്‌ലസില്‍ ഇത്‌ രേഖപ്പെടുത്തില്ലെന്ന്‌ പ്രകൃതി സ്ഥിതി പഠന ഓഫീസ്‌ വ്യക്തമാക്കി.
0 comments:
Post a Comment