ഓഹരി വിപണിയില്‍ ആശ്വാസത്തിന്റെ ദിനം

മുംബൈ: വിലയിടിവു രേഖപ്പെടുത്തിയ ഓഹരികള്‍ വാങ്ങാന്‍ ഇടപാടുകാര്‍ നടത്തിയ മല്‍സരം സെന്‍സെക്‌സ്‌, നിഫ്‌ടി ഓഹരി സൂചികകളെ വീണ്ടും വളര്‍ച്ചയുടെ പാതയിലെത്തിച്ചു. കഴിഞ്ഞദിവസം നഷ്‌ടപ്പെട്ടതിന്റെ മൂന്നിലൊന്ന്‌ പോയിന്റ്‌ സൂചികകള്‍ ഇന്നലെ തിരിച്ചുപിടിച്ചു. ഏഷ്യന്‍ സൂചികകളുടെ തിരിച്ചുവരവും ഷോര്‍ട്ട്‌ കവറിംഗും ഇതില്‍ പ്രധാന പങ്ക്‌ വഹിച്ചു.
ബോംബെ ഓഹരി സൂചികയായ സെന്‍സെക്‌സ്‌ 250.34 പോയിന്റും ദേശീയ ഓഹരി സൂചികയായ നിഫ്‌ടി 71 പോയിന്റും ഉയര്‍ന്നു. സെന്‍സെക്‌സ്‌ വീണ്ടും 15,000 എന്ന നിലവാരം മറികടന്നു. 15135-14740 പരിധിയില്‍ വ്യാപാരം നടന്ന ബോംബെ ഓഹരി സൂചിക 250.34 പോയിന്റ്‌ ഉയര്‍ന്ന്‌ 15035.26 ല്‍ വ്യാപാരം അവസാനിപ്പിച്ചു.
വ്യാപാരത്തിനിടെ 4500 ന്‌ സമീപമെത്തിയ ദേശീയ ഓഹരി സൂചിക 71 പോയിന്റ്‌ ഉയര്‍ന്ന്‌ 4458.90 ല്‍ വ്യാപാരം അവസാനിപ്പിച്ചു. വിപണിയില്‍ സ്‌ഥിരത രേഖപ്പെടുത്തുന്നതിന്‌ മുന്നോടിയായ വ്യതിയാനമാണ്‌ ഇന്നലെ കണ്ടതെന്നാണ്‌ റിപ്പോര്‍ട്ടുകള്‍.