സ്‌പെയിനിലെ 5000 ഇന്ത്യക്കാര്‍ക്ക്‌ നിയമപരിരക്ഷ നല്‍കും
മാഡ്രിഡ്‌: സ്‌പെയിനില്‍ താമസിക്കാനുള്ള കാലാവധി നീട്ടിലഭിക്കാത്തതിനെ തുടര്‍ന്ന്‌ ദുരിതമനുഭവിക്കുന്ന അയ്യായിരത്തോളം ഇന്ത്യക്കാര്‍ക്ക്‌ ഉടന്‍ നിയമ പരിരക്ഷ നല്‍കാന്‍ തീരുമാനമായി. ചില ഇന്ത്യക്കാരുടെ താമസകാലാവധി നീട്ടികൊടുക്കുന്നതിലുള്ള സാങ്കേതിക തടസങ്ങള്‍ക്കാണ്‌ ഇന്ത്യന്‍ വിദേശകാര്യ മന്ത്രാലയവും സ്‌പാനിഷ്‌ അധികൃതരും തമ്മിലുള്ള ചര്‍ച്ചയില്‍ പരിഹാരമായത്‌.
ഈ വര്‍ഷമാദ്യം വ്യാപാരികളും സാങ്കേതിക വിദഗ്‌ധരുമുള്‍പ്പെടുന്ന ഇന്ത്യന്‍ വംശജരുടെ കാലാവധി നീട്ടിക്കൊടുക്കാന്‍ ഇന്ത്യയില്‍ നിന്നുള്ള കേന്ദ്രപൊലീസ്‌ വെരിഫിക്കേഷന്‍ ആവശ്യമാണെന്ന്‌ സ്‌പാനിഷ്‌ അധികൃതര്‍ അറിയച്ചതോടെയാണ്‌ പ്രശ്‌നങ്ങള്‍ ആരംഭിച്ചത്‌. ഇന്ത്യയില്‍ പൊലീസ്‌ വകുപ്പ്‌ സംസ്ഥാന സര്‍ക്കാരുകളുടെ കീഴിലായതിനാല്‍ കേന്ദ്ര അധികൃതരില്‍ നിന്നുള്ള വെരിഫിക്കേഷന്‍ റിപ്പോര്‍ട്ട്‌ ഇവര്‍ക്ക്‌ സമര്‍പ്പിക്കാനായില്ല.
ഇരു രാജ്യങ്ങളും അംഗീകരിച്ച പുതിയ കരാര്‍ പ്രകാരം ഇന്ത്യന്‍ വംശജരുടെ വെരിഫിക്കേഷന്‍ രേഖകള്‍ സ്‌പെയിനിലെ ഇന്ത്യന്‍ എംബസി പരിശോധിച്ച്‌ നല്‍കിയാല്‍ മതിയാകും. ഇന്ത്യക്കാര്‍ക്കായി നിയമത്തില്‍ ഇളവ്‌ വരുത്താന്‍ തയാറായ സ്‌പെയിന്‍ അധികൃതരെ ഇന്ത്യന്‍ വിദേശകാര്യ മന്ത്രാലയം നന്ദി അറിയിച്ചു.
0 comments:
Post a Comment